کراچی میں پہلی ملیر کینٹ میراتھن کا انعقاد

کراچی: رننگ کلب ملیر کینٹ پیسرز نے شہدا کو خراج تحسین پیش کرنے کے لیے پہلی بار ملیر کینٹ میراتھن کا انعقاد کیا۔ اتوار کو منعقد ہونے والے ایونٹ میں تین، پانچ اور دس کلومیٹر کی کیٹیگریز میں شاندار کارکردگیاں دیکھنے کو آئیں۔

دس کلومیٹر کی کیٹیگری میں احمد حسن نے 44 منٹ میں پہلی پوزیشن حاصل کی، محبوب رحمان نے 45 منٹ، اور سعید منیر نے 46 منٹ میں ریس مکمل کی۔ خواتین میں دس کلومیٹر کی فاتح فاطمہ مظہر رہیں جنہوں نے 55 منٹ میں فاصلہ طے کیا، جبکہ شانزے احمد نے ایک گھنٹہ 8 منٹ اور مریم رید نے ایک گھنٹہ 9 منٹ میں ریس مکمل کی۔

پانچ کلومیٹر کی کیٹیگری میں فواز بٹ نے 19 منٹ میں پہلی پوزیشن حاصل کی، عبدالحنان نے 20 منٹ اور ایم سی پی احسن طاہر نے 21 منٹ میں ریس مکمل کی۔ خواتین میں پانچ کلومیٹر کی فاتح حنا کامران رہیں جنہوں نے 32 منٹ میں فاصلہ طے کیا، جبکہ افرا سلیم نے 33 منٹ اور فاطمہ ہاشمی نے 34 منٹ میں ریس مکمل کی۔

ایونٹ میں 200 سے زائد شرکاء نے حصہ لیا، جن میں 149 مرد اور 52 خواتین شامل تھیں۔ دس کلومیٹر کی پہلی پوزیشن حاصل کرنے والے کو 10 ہزار روپے جبکہ دوسری اور تیسری پوزیشن حاصل کرنے والوں کو 5،5 ہزار روپے انعام کے طور پر دیے گئے۔

ملیر کینٹ کے اسٹیشن کمانڈر بریگیڈیئر حسنات احمد نے دوڑ میں بطور مہمان خصوصی شرکت کی اور جیتنے والوں میں انعامات تقسیم کیے۔

اس میراتھن کا مقصد صحت مند طرزِ زندگی اور کمیونٹی اسپورٹس کے فروغ کی طرف اہم قدم کے طور پر دیکھا جا رہا ہے۔