بھارت میں گدھے کے نام پر نرسنگ رجسٹریشن سرٹیفکیٹ جاری

بھارت میں نرسنگ رجسٹریشن کے آن لائن نظام کی خامیوں کو بے نقاب کرنے کے لیے ایک حیران کن واقعہ سامنے آیا ہے، جہاں مدھیہ پردیش نرسز رجسٹریشن کونسل کے پورٹل پر مبینہ طور پر گدھے کی تصویر اور جعلی دستاویزات کے ذریعے عارضی نرسنگ رجسٹریشن سرٹیفکیٹ جاری کر دیا گیا۔ این ایس یو آئی کے ریاستی نائب صدر روی پرمار نے آن لائن سسٹم کو آزمانے کے لیے درخواست میں امیدوار کی تصویر کی جگہ گدھے کی تصویر اپ لوڈ کی، والد کے نام میں ’Donkey Father‘ درج کیا اور بغیر کسی اصل تعلیمی قابلیت کے فرضی کاغذات منسلک کیے۔ فیس کی ادائیگی کے بعد سسٹم نے بغیر کسی مؤثر تصدیق کے رجسٹریشن سرٹیفکیٹ جاری کر دیا۔ سوشل میڈیا پر اس واقعے کی تصاویر وائرل ہونے کے بعد نرسنگ کے تعلیمی اور تصدیقی نظام پر شدید سوالات اٹھائے جا رہے ہیں، جس کے بعد کونسل نے سسٹم ویریفکیشن چیکس نافذ ہونے تک رجسٹریشن کا عمل عارضی طور پر روک دیا ہے۔