جماعت اسلامی کے دفتر پر حملے میں روسی ساختہ بم استعمال کیا گیا، بم ڈسپوزل یونٹ کی رپورٹ

کراچی کے علاقے لیاری کی پھول پتی لین میں جماعت اسلامی کے زیرِ تعمیر دفتر پر ہونے والے دستی بم حملے کے بعد بم ڈسپوزل یونٹ (بی ڈی یو) نے جائے وقوعہ کا تفصیلی معائنہ مکمل کر کے اپنی ابتدائی رپورٹ مرتب کر لی ہے۔ بی ڈی یو کی رپورٹ کے مطابق، اس حملے میں روسی ساختہ ‘آر جی ڈی ون’ (RGD-1) دستی بم استعمال کیا گیا ہے۔ دھماکے کی جگہ سے پولیس اور بم ڈسپوزل اسکواڈ کو بم کا لیور اور اس کی باڈی کے تقریباً 20 چھوٹے بڑے ٹکڑے ملے ہیں۔ رپورٹ میں مزید بتایا گیا ہے کہ دھماکے کی شدت سے زمین پر 3 انچ گہرا اور 8 انچ چوڑا گڑھا بن گیا، جبکہ لیاری میں ماضی میں ہونے والے دستی بم حملوں میں بھی 60 سے 70 فیصد تک روسی ساختہ بم ہی استعمال کیے گئے ہیں۔

دوسری جانب، امیر جماعت اسلامی کراچی منعم ظفر نے سول ہسپتال کا دورہ کیا اور دھماکے میں زخمی ہونے والے جماعت کے تینوں کارکنوں کی عیادت کی۔ اس موقع پر میڈیا سے گفتگو کرتے ہوئے منعم ظفر نے حملے کی شدید مذمت کی اور اسے بدترین دہشت گردی قرار دیا۔ انہوں نے صوبائی حکومت اور قانون نافذ کرنے والے اداروں پر کڑی تنقید کرتے ہوئے کہا کہ لیاری جیسے انتہائی گنجان آباد علاقے میں دن دہاڑے حملہ کر کے دہشت گردوں کا باآسانی فرار ہو جانا پولیس کی کارکردگی اور سیکیورٹی انتظامات پر ایک بہت بڑا سوالیہ نشان ہے۔ کراچی اور سندھ بھر میں بڑھتی ہوئی لاقانونیت اور بدامنی نے شہریوں کی زندگیوں کو داؤ پر لگا دیا ہے۔”

منعم ظفر نے عزم ظاہر کیا کہ لیاری کے عوام نے جس طرح جماعت اسلامی پر اپنے بھرپور اعتماد کا اظہار کیا ہے، اس سے مخالفین شدید بوکھلاہٹ کا شکار ہو چکے ہیں۔ انہوں نے واضح کیا کہ اس طرح کے بزدلانہ ہتھکنڈوں سے جماعت اسلامی کے حوصلے پست نہیں کیے جا سکتے اور پارٹی کی ’حق دو لیاری کو‘ مہم اور ’بدل دو نظام‘ تحریک ہر صورت پوری قوت کے ساتھ جاری رہے گی۔