شارکس پر جدید سینسرز نصب، سائنسدانوں کا شارک سے انوکھا کام لینا شروع

فلموں میں شارک مچھلی کو ہمیشہ ایک خونخوار اور خوفناک شکاری کے طور پر دکھایا جاتا ہے، لیکن امریکی سائنسدان اب انہی شارکس کو سمندروں کی تہوں سے اہم معلومات اکٹھی کرنے والے قدرتی ‘ڈیٹا آبزرور’ کے طور پر استعمال کر رہے ہیں۔ یونیورسٹی آف ڈیلاویئر کی تحقیق کے مطابق، محققین شارکس پر ایسے الیکٹرانک سینسرز (Tags) نصب کر رہے ہیں جو سمندر کے پانی کے درجہ حرارت، نمکیات کی مقدار اور گہرائی کا ریئل ٹائم ڈیٹا ریکارڈ کرتے ہیں۔ یہ متحرک سینسرز جیسے ہی شارک سطحِ آب پر آتی ہے، سیٹلائٹ نیٹ ورک کے ذریعے تمام اہم معلومات سائنسدانوں تک منتقل کر دیتے ہیں، جس سے موسمیاتی اور ماحولیاتی ماڈلنگ میں بڑی پیشرفت کی توقع ہے۔

اس تحقیق کے سربراہ پروفیسر آرون کارلائل اور ان کی ٹیم کے مطابق شمالی بحرِ اوقیانوس (North Atlantic) میں شارٹ فِن ماکو، بلیو شارک، سموتھ ہیمر ہیڈ اور کم عمر گریٹ وائٹ شارک جیسی نسلوں پر یہ سینسرز کامیابی سے لگائے جا رہے ہیں۔ جانوروں کی فلاح و بہبود کا خاص خیال رکھتے ہوئے 5 منٹ سے بھی کم وقت میں ٹیگ نصب کیا جاتا ہے، جو وقت کے ساتھ گل کر خود بخود الگ ہو جاتا ہے۔ سائنسدانوں کو امید ہے کہ اگر یہ منصوبہ مکمل طور پر کامیاب رہتا ہے تو شارکس سے حاصل کردہ ڈیٹا امریکی مشرقی ساحل کی طرف بڑھنے والے خوفناک سمندری طوفانوں اور ہیکینز (Hurricanes) کی شدت کی قبل از وقت درست پیشگوئی کرنے میں انتہائی معاون ثابت ہوگا۔