آبنائے ہرمز میں پاسدارانِ انقلاب کے حملوں کا سسلہ جاری ہے: برطانیہ

برطانوی میری ٹائم ٹریڈ آپریشنز (UKMTO) نے اپنی تازہ ترین ماہانہ رپورٹ میں خبردار کیا ہے کہ مشرق وسطیٰ اور بالخصوص آبنائے ہرمز کی آبی گزرگاہ میں خطرے کی سطح بدستور انتہائی شدید ہے اور تجارتی بحری جہازوں پر حملوں کا سلسلہ جاری ہے۔ برطانوی ایجنسی کے مطابق حالیہ پیش رفت میں آبنائے ہرمز سے گزرنے والے متحدہ عرب امارات کے ایک آئل ٹینکر کو نشانہ بنایا گیا ہے، جس کے باعث اس اہم سمندری راستے سے تجارتی بحری آمدورفت کی سطح انتہائی کم ہو کر رہ گئی ہے اور اس وقت صرف چند مخصوص جہاز ہی یہاں سے گزر رہے ہیں۔

یو کے ایم ٹی او کی رپورٹ میں نشاندہی کی گئی ہے کہ ایرانی پاسدارانِ انقلاب (IRGC) کی جانب سے بحری جہازوں کو ہراساں کرنے، ریڈیو مواصلات کے ذریعے شناخت طلب کرنے، ڈرونز پروازوں اور مسلسل نگرانی کا عمل جاری ہے تاکہ اس اہم گزرگاہ پر کنٹرول اور دباؤ برقرار رکھا جا سکے۔ رپورٹ میں مزید بتایا گیا کہ عمانی ساحلوں اور جنوبی بحری راستوں بالخصوص لیما، خصب اور کمزار کے قریب میزائل یا پروجیکٹائل فائر کیے جانے اور دھماکوں جیسے واقعات پیش آ رہے ہیں۔ ایجنسی نے آبنائے ہرمز میں سمندری بارودی سرنگوں (Sea Mines) کے بڑھتے ہوئے خطرے سے بھی تجارتی بحری سرگرمیوں کو شدید خبردار کیا ہے۔