ایران کو فوجی دباؤ سے زیادہ امریکی اقتصادی پابندیوں کی فکر ہے: امریکا

اقوام متحدہ میں متعین امریکی سفیر مائیک والٹز نے دعویٰ کیا ہے کہ ایرانی انتظامیہ کو کسی بھی فوجی کارروائی یا خطرے کی نسبت امریکی اقتصادی پابندیوں اور معاشی دباؤ کی زیادہ فکر لاحق ہے۔

فاکس نیوز کو دیے گئے ایک انٹرویو میں امریکی مندوب مائیک والٹز کا کہنا تھا کہ ایران کو وزیر جنگ (سیکریٹری دفاع) پیٹ ہیگستھ کی نسبت امریکی وزیر خزانہ اسکاٹ بیسنٹ سے زیادہ خوف ہے۔ انہوں نے بتایا کہ اسکاٹ بیسنٹ کی زیرِ قیادت جاری ’آپریشن اکنامک فیوری‘ (Operation Economic Fury) ایرانی معیشت کو شدید اور ناقابلِ تلافی نقصان پہنچا رہا ہے۔

مائیک والٹز نے انکشاف کیا کہ بین الاقوامی مذاکرات کی میز پر ایرانی نمائندے بار بار نقد رقم کی فراہمی اور اپنے منجمد شدہ اثاثوں تک رسائی کا مطالبہ کرتے ہیں۔ ان کا مزید کہنا تھا کہ ایران میں ملکی کرنسی کی قدر میں مسلسل کمی اور ریکارڈ مہنگائی نے معاشی دباؤ کو دوچند کر دیا ہے، جبکہ پاسدارانِ انقلاب (IRGC) ایرانی معیشت کے ایک بہت بڑے حصے پر قابض ہے۔ امریکی سفیر نے الزام عائد کیا کہ ایران میں قائم کرپٹ اور مذہبی انتہا پسند نظام نے دہائیوں سے عوام کو مشکلات میں مبتلا کر رکھا ہے۔ انہوں نے زور دیا کہ اقتصادی دباؤ کے ساتھ ساتھ بحری ناکہ بندی بھی ایران کو گھیر رہی ہے اور واشنگٹن کا یہی ہمہ جہت دباؤ بالآخر تہران کو اپنے موقف میں تبدیلی پر مجبور کر دے گا۔