مسلم لیگ (ن) دو تہائی اکثریت سے آزاد کشمیر میں حکومت بنائے گی: رانا ثناء اللہ

وزیراعظم کے مشیر برائے سیاسی امور رانا ثناء اللہ اور وفاقی وزیر انجنیئر امیر مقام نے مشترکہ پریس کانفرنس کرتے ہوئے دعویٰ کیا ہے کہ پاکستان مسلم لیگ (ن) دو تہائی اکثریت کے ساتھ آزاد کشمیر میں اگلی حکومت قائم کرے گی۔ انہوں نے واضح کیا کہ دھرنے اور احتجاج کرنے والے عناصر انتخابات کو روکنے میں مکمل ناکام رہے ہیں اور دشمن کے ہاتھوں میں کھیلنے والے شرپسندوں کو قانون کا سامنا کرنا پڑے گا۔

اسلام آباد میں میڈیا سے گفتگو کرتے ہوئے رانا ثناء اللہ نے کہا کہ آزاد کشمیر انتخابات کے فیز 3 کا عمل کامیابی سے جاری ہے۔ انہوں نے اپوزیشن جماعت بالخصوص پاکستان پیپلز پارٹی (پی پی پی) کے دھاندلی کے الزامات کو مسترد کرتے ہوئے کہا کہ مرحلہ وار الیکشن کا مطالبہ خود پیپلز پارٹی نے کیا تھا جسے الیکشن کمیشن نے تسلیم کیا۔ انہوں نے کہا کہ پرامن انتخابات کو متاثر کرنا جمہوری عمل نہیں اور پیپلز پارٹی کو چاہیے کہ وہ مسلم لیگ (ن) کی متوقع فتح کا احترام کرتے ہوئے مبارکباد پیش کرے۔ مسلح تشدد اور ہنگامہ آرائی پر بات کرتے ہوئے انہوں نے متنبہ کیا کہ جن عناصر نے قانون ہاتھ میں لیا یا ہتھیار اٹھائے، ان کے خلاف سخت قانونی کارروائی ہوگی۔

اس موقع پر وفاقی وزیر انجنیئر امیر مقام نے کہا کہ مخالفین نے ہار کے ڈر سے رات کو ہی الزام تراشی کا سکرپٹ تیار کر لیا تھا اور صبح 9 بجے سے ہی بیانات دینا شروع کر دیے تھے۔ انہوں نے پنجاب سے پولیس بلانے کے الزامات کو مسترد کرتے ہوئے سوال اٹھایا کہ کیا سندھ سے لوگ نہیں آئے تھے؟ انہوں نے کہا کہ آزاد کشمیر کے عوام نے مسلم لیگ (ن) کے حق میں فیصلہ دے دیا ہے اور اپوزیشن کو رونے دھونے کے بجائے اپنی ناکامی کا جائزہ لینا چاہیے۔