اداکارہ سے مبینہ زیادتی کا الزام، 73 سالہ بھارتی فلم ڈائریکٹر گرفتار

بھارتی فلم انڈسٹری (بالی ووڈ) کے معروف 73 سالہ ڈائریکٹر و پروڈیوسر شکیل نورانی کو ایک 33 سالہ اداکارہ کی جانب سے مبینہ جنسی زیادتی اور بلیک میلنگ کے سنگین الزامات کے بعد ممبئی پولیس نے گرفتار کر لیا ہے۔ متاثرہ اداکارہ کی جانب سے درج کروائی گئی ایف آئی آر کے مطابق، ہدایت کار نے انہیں ایک نجی پروجیکٹ کے اسکرپٹ پر بات چیت کے بہانے اپنے گھر بلایا اور مشروب میں نشہ آور دوا ملا کر بے ہوش کرنے کے بعد جنسی زیادتی کا نشانہ بنایا۔

اداکارہ نے مزید الزام عائد کیا کہ ملزم نے اس واقعے کی خفیہ ویڈیو بنا کر انہیں بلیک میل کیا اور پولیس یا اہلخانہ کو بتانے پر ویڈیو وائرل کرنے کی دھمکیاں دیں۔ ممبئی کی مالوانی پولیس نے بھارتیہ نیاؤ سنہیتا (BNS) کی سخت دفعات کے تحت مقدمہ درج کرتے ہوئے کارروائی کی اور روپوش ہدایت کار کو مہاراشٹر کے ضلع ستارہ سے گرفتار کر لیا۔ ملزم کو مقامی عدالت میں پیش کیا گیا جہاں سے عدالت نے انہیں 12 اگست تک پولیس تحویل میں بھیجنے کے احکامات جاری کر دیے ہیں۔ واضح رہے کہ شکیل نورانی گووندا کی مشہور فلم ’جورو کا غلام‘ اور سنیل شیٹی کی ’بڑے دل والا‘ جیسی مقبول فلموں کی ہدایت کاری و پروڈکشن سے وابستہ رہے ہیں۔