پیپلز پارٹی کے رہنما عبدالقادر پٹیل کے مرکزی دفتر پر فائرنگ، ملزمان فرار

کراچی کے علاقے کلفٹن بوٹ بیسن میں پاکستان پیپلز پارٹی (پی پی پی) کے سینئر رہنما اور سابق وفاقی وزیر عبدالقادر پٹیل کے مرکزی دفتر پر نامعلوم کار سوار مسلح افراد نے فائرنگ کر دی، تاہم خوش قسمتی سے واقعے میں کوئی جانی نقصان نہیں ہوا۔

تفصیلات کے مطابق مسلح حملہ آوروں نے کار میں سوار ہو کر عبدالقادر پٹیل کے مرکزی دفتر کو نشانہ بنایا اور دنا دن گولیاں برسا دیں۔ گولیاں خاص طور پر دفتر کے اس مرکزی دروازے پر ماری گئیں جہاں سے عبدالقادر پٹیل کا معمول کے مطابق آنا جانا ہوتا ہے۔ فائرنگ کی شدت کے باعث کئی گولیاں دروازے کے آر پار ہو گئیں، تاہم واقعے کے وقت دفتر میں موجود افراد محفوظ رہے۔

واقعے کی اطلاع ملتے ہی ایس ایچ او بوٹ بیسن محمد ریاض کی قیادت میں پولیس کی بھاری نفری اور کرائم سین فائنڈنگ و فارنزک ٹیمیں موقع پر پہنچ گئیں۔ پولیس اور فارنزک ماہرین نے جائے وقوعہ کا باریک بینی سے معائنہ کرتے ہوئے گولیوں کے خول اور دیگر اہم شواہد اکھٹے کر لیے ہیں۔ پولیس نے علاقے میں لگے سی سی ٹی وی کیمروں کی فوٹیج حاصل کر کے ملزمان کی تلاش اور واقعے کی تحقیقات کا آغاز کر دیا ہے۔