امریکی سکیورٹی گارنٹی ناقابل اعتبار ہونے پر مکہ دفاعی معاہدہ ہوا: ایران

ایرانی وزارتِ خارجہ کے ترجمان اسماعیل بقائی نے کہا ہے کہ پاکستان، ترکیہ اور سعودی عرب کے درمیان طے پانے والے نئے دفاعی معاہدے سے ایران کو کسی قسم کا خطرہ نہیں ہے۔ انہوں نے واضح کیا کہ مشرقِ وسطیٰ میں امریکی سیکیورٹی گارنٹی کی واضح ناکامی کے بعد خطے کے ممالک اپنے دفاع اور سلامتی کے لیے نئے علاقائی معاہدے تشکیل دے رہے ہیں۔

پریس بریفنگ کے دوران گفتگو کرتے ہوئے ترجمان ایرانی وزارتِ خارجہ نے کہا کہ سیکیورٹی جھوٹے بروکروں سے خریدے جانے والی شے نہیں ہے اور خطے کے ممالک اب اس حقیقت کو اچھی طرح سمجھ چکے ہیں۔ ان کا کہنا تھا کہ حقائق پر مبنی اور دشمن کی درست نشاندہی کرنے والا ہر نیا معاہدہ علاقائی سلامتی کو تقویت دیتا ہے۔

اسماعیل بقائی نے امریکی مداخلت پر تنقید کرتے ہوئے کہا کہ اگر کوئی تیسری قوت مداخلت نہ کرے تو آبنائے ہرمز (Strait of Hormuz) کو بحری آمدورفت کے لیے کھولا جا سکتا ہے۔ انہوں نے خطے کے تمام اسلامی و برادر ممالک پر زور دیا کہ وہ ایران کے خلاف اپنی سرزمین کسی صورت استعمال نہ ہونے دیں۔ انہوں نے خبردار کیا کہ اگر باہمی معاہدوں کی خلاف ورزیاں جاری رہیں تو کسی قسم کی بات چیت ممکن نہیں رہے گی۔