اسماء جتک کو دھمکیوں اور اہل خانہ کے قتل کی تحقیقات کے لیے انکوائری کمیٹی قائم

حکومتِ بلوچستان نے سوشل میڈیا پر وائرل ہونے والی ویڈیو کے بعد پیدا ہونے والے افسوسناک واقعے پر ایکشن لیتے ہوئے اسماء جتک کو مبینہ دھمکیوں اور ان کے والد کے قتل کی تحقیقات کے لیے ایک باقاعدہ انکوائری کمیٹی قائم کر دی ہے۔ اس حوالے سے باضابطہ نوٹیفکیشن جاری کر دیا گیا ہے، جس کے تحت کمشنر قلات ڈویژن کو انکوائری کمیٹی کا چیئرمین مقرر کیا گیا ہے۔ کمیٹی کے دیگر ارکان میں ڈپٹی کمشنر حب، ڈپٹی کمشنر آواران اور ایس پی حب شامل ہیں، جبکہ ایس پی حب کو کمیٹی کے سیکرٹری کی ذمہ داریاں بھی سونپی گئی ہیں۔

نوٹیفکیشن کے مطابق مختلف حساس و تحقیقاتی اداروں کے نمائندے بھی اس کمیٹی کی معاونت کریں گے تاکہ واقعے کے تمام تناظر اور پہلوؤں کا غیر جانبدارانہ اور باریک بینی سے جائزہ لیا جا سکے۔ یہ تحقیقاتی کمیٹی اسماء جتک کو دی جانے والی دھمکیوں، ان کے اہل خانہ کے ساتھ پیش آنے والے سانحے اور اس سے جڑے دیگر تمام معاملے کی تفصیلی تحقیقات مکمل کر کے 15 دنوں کے اندر اپنی رپورٹ حکومتِ بلوچستان کو پیش کرنے کی پابند ہوگی۔ واضح رہے کہ کچھ روز قبل اسماء جتک نے اپنے ہاتھ میں قرآن پاک اٹھا کر ایک ویڈیو پیغام جاری کیا تھا جس میں انہوں نے اپنی اور اپنے خاندان کی سیکیورٹی کی اپیل کی تھی، تاہم اس ویڈیو کے کچھ ہی گھنٹوں بعد ان کے والد کو قتل کر دیا گیا تھا۔