کیریبین جزیرے میں واقع تاریخی آتش فشاں ماؤنٹ پیلے ایک بار پھر فعال

کیریبین جزیرے مارٹنیک میں واقع تاریخی اور خطرناک آتش فشاں ‘ماؤنٹ پیلے’ میں زلزلوں اور سرگرمیوں کے اضافے کے بعد ماہرین نے اس کی سخت نگرانی شروع کر دی ہے۔ شائع شدہ رپورٹس کے مطابق 24 سے 31 جولائی کے دوران آتش فشاں کے ارد گرد 124 زلزلے ریکارڈ کیے گئے، جبکہ اس سے پچھلے ہفتے یہ تعداد صرف 45 تھی۔ جولائی کے پورے مہینے میں مجموعی طور پر 331 آتش فشانی زلزلے ریکارڈ کیے گئے ہیں، جس کے بعد علاقائی حکام الرٹ ہو گئے ہیں۔

ماؤنٹ پیلے کا شمار دنیا کے خوفناک ترین آتش فشاں پہاڑوں میں ہوتا ہے۔ اس نے 1902ء میں تاریخ کے بدترین آتش فشانی حادثات میں سے ایک کو جنم دیا تھا، جب اس کے پھٹنے سے نکلنے والی شدید گرم گیسوں اور راکھ کے بادل نے پورٹ سٹی ‘سینٹ پیئر’ کو لمحوں میں تباہ کر دیا تھا اور تقریباً 30 ہزار افراد اپنی جانوں سے ہاتھ دھو بیٹھے تھے۔ ارضیاتی ماہرین کی وضاحت کے مطابق، یہ زلزلے زیرِ زمین میگما کی نقل وحرکت سے چٹانوں پر بننے والے دباؤ کے باعث اُمڈ رہے ہیں۔ ماہرین کا کہنا ہے کہ زلزلوں کی تعداد میں اضافہ لازمی طور پر آتش فشاں پھٹنے کا حتمی اشارہ نہیں ہوتا، تاہم اگر کوئی بڑا دھماکا ہوا تو زہریلی گیسیں اور راکھ کے بادل شمالی مارٹنیک اور کیریبین کی فضائی حدود کی پروازوں کو شدید متاثر کر سکتے ہیں۔