لاہور ہائیکورٹ نے بانی پی ٹی آئی کی بہنوں کی بازیابی کی درخواست نمٹا دی

لاہور ہائیکورٹ کی جسٹس عبہر گل خان نے بانی پی ٹی آئی عمران خان کی تینوں بہنوں علیمہ خانم، عظمیٰ خانم اور نورین نیازی کی بازیابی کے لیے دائر درخواست پر سماعت کی۔ دورانِ سماعت پنجاب حکومت کے وکیل نے عدالت کو آگاہ کیا کہ ہوم سیکرٹری کی رپورٹ کے مطابق تینوں بہنوں کی نظر بندی کے احکامات میں مزید 30 روز کی توسیع کر دی گئی ہے۔ عدالت نے درخواست گزار کو تنبیہ کی کہ ڈی سی لاہور نے نظر بندی کا نوٹیفکیشن جاری کیا لیکن درخواست میں ڈی سی کو فریق ہی نہیں بنایا گیا، اور عدالت اپنی درخواست کی حد سے باہر جا کر کوئی آرڈر جاری نہیں کر سکتی۔ بعد ازاں لاہور ہائیکورٹ نے ہوم سیکرٹری پنجاب کی تفصیلی رپورٹ کی روشنی میں بازیابی کی درخواست کو باقاعدہ نمٹا دیا۔