ایمان مزاری اور ہادی چھٹہ کی اسلام آباد ہائیکورٹ فیصلے کے خلاف سپریم کورٹ میں اپیل، ٹرائل فوراً روکنے کی استدعا

ایمان مزاری اور ہادی چھٹہ نے انسدادِ دہشت گردی دفعات کے اخراج اور ٹرائل پر حکمِ امتناع سے متعلق اسلام آباد ہائیکورٹ کے فیصلے کے خلاف سپریم کورٹ میں درخواست دائر کر دی ہے۔ درخواست میں موقف اپنایا گیا ہے کہ ٹرائل کورٹ نے بغیر مناسب وقت دیے جلد بازی میں کارروائی کا آغاز کیا اور ایک ہی دن میں استغاثہ کے گواہان کے بیانات ریکارڈ کر لیے۔ مؤقف پیش کیا گیا ہے کہ سیکیورٹی بیریئرز ہٹانا دہشت گردی کے زمرے میں نہیں آتا اور یہ ٹرائل محض حراساں کرنے، سیاسی انتقام اور ملزمان کو جیل میں رکھنے کا ذریعہ ہے۔ درخواست گزاروں نے استدعا کی ہے کہ اگر ٹرائل کو فوری طور پر نہ روکا گیا تو ہائیکورٹ میں زیر التواء مرکزی درخواست غیر موثر ہو جائے گی۔ واضح رہے کہ 19 اکتوبر کو اسلام آباد ہائیکورٹ نے انسدادِ دہشت گردی کی دفعات ختم کرنے سے متعلق درخواستوں میں عبوری حکم کی استدعا مسترد کرتے ہوئے صرف نوٹسز جاری کیے تھے۔