کراچی میں ڈبل ڈیکر بس سروس کا آغاز

سینئر وزیر ٹرانسپورٹ و اطلاعات شرجیل انعام میمن نے ایدھی اورنج لائن اور گرین لائن بی آر ٹی کے انضمام کا افتتاح کر دیا۔ ایدھی اورنج لائن کے چار کلومیٹر ٹریک کو گرین لائن سے منسلک کر دیا گیا ہے جس سے اورنگی کے مکینوں کو نمائش اور ناگن چورنگی تک سفر میں نمایاں آسانی ہوگی۔

شرجیل میمن نے بتایا کہ مسافروں کی شکایات کے پیش نظر دونوں بی آر ٹی لائنز کو یکجا کیا گیا ہے، اب مسافروں کو الگ الگ کرایہ ادا نہیں کرنا ہوگا۔ گرین لائن بی آر ٹی کا انتظام سندھ حکومت کو ملنے کے بعد یومیہ رائیڈرشپ 75 ہزار تک پہنچ چکی ہے جبکہ ہدف ایک لاکھ مسافروں کا ہے۔

انہوں نے کہا کہ سندھ خطے کی پہلی حکومت ہے جس نے خواتین کیلئے الگ بی آر ٹی سروس شروع کی۔ شرجیل میمن نے اعلان کیا کہ کل سے کراچی میں ڈبل ڈیکر بس سروس شروع ہو جائے گی، نئی ای وی بسیں بھی کراچی پہنچ چکی ہیں اور ملیر سے شاہراہ فیصل تک ڈبل ڈیکر بسیں چلیں گی۔

سینئر وزیر نے مزید بتایا کہ حیدرآباد میں پیپلز بس روٹس میں اضافہ کیا جا رہا ہے جبکہ خیرپور، شکارپور اور ٹنڈوالہ یار میں بھی پیپلز بس سروس شروع کی جائے گی۔ انہوں نے ریڈ لائن بی آر ٹی پر کام، سرکاری زمینوں کے تحفظ اور وزیراعظم سے 150 بسوں کے اعلان پر وعدہ پورا کرنے کی درخواست کا بھی ذکر کیا۔