فیفا ورلڈکپ: لامین یمال کی گول اسکور کرکے ’سجدہ‘ کرنے کی ویڈیو وائرل

اسپین کے نوجوان فٹبال سنسنی اور دنیا کے ابھرتے ہوئے اسٹار لامین یامال (Lamine Yamal) فیفا ورلڈکپ 2026 میں نہ صرف اپنی جادوئی کارکردگی بلکہ میدانِ عمل میں پیش آنے والے ایک انتہائی جذباتی اور تاریخی لمحے کے باعث اس وقت عالمی میڈیا اور سوشل میڈیا پر ٹرینڈ کر رہے ہیں۔

18 سالہ لامین یامال نے سعودی عرب کے خلاف کھیلے گئے گروپ مرحلے کے ایک اہم میچ میں اسپین کی 0-4 سے یکطرفہ اور شاندار فتح میں کلیدی کردار ادا کیا۔ انہوں نے میچ کے آغاز ہی سے حریف ٹیم پر دباؤ بڑھایا اور دسویں منٹ میں ایک بہترین فیلڈ گول اسکور کر کے اپنی ٹیم کو پوزیشن مستحکم کرنے کے لیے ابتدائی برتری دلا دی۔

گول اسکور کرنے کے فوراً بعد نوجوان فٹبالر روایتی انداز میں اچھل کود کرنے کے بجائے گراؤنڈ میں ہی گھٹنوں کے بل بیٹھ گئے اور بارگاہِ الٰہی میں سجدۂ شکر ادا کیا۔ان کا یہ عاجزی سے بھرپور اور شاندار انداز اسٹیڈیم میں موجود ہزاروں شائقین کی توجہ کا مرکز بن گیا، جس پر پورا اسٹیڈیم تالیوں سے گونج اٹھا۔ میچ کے فوری بعد سجدے کی یہ تصاویر اور ویڈیوز انٹرنیٹ کے تمام بڑے پلیٹ فارمز پر جنگل کی آگ کی طرح پھیل گئیں۔ دنیا بھر کے فٹبال مداحوں نے لامین یامال کے اس جذبۂ شکرگزاری کو بے حد پسند کیا اور ان کی عاجزی کی تعریف کی۔

بہت سے کھیلوں کے مبصرین اور فٹبال شائقین نے لامین یامال کے اس عمل کو فیفا ورلڈکپ 2026 کے اب تک کے سب سے خوبصورت اور یادگار لمحات میں سے ایک قرار دیا ہے، جو طویل عرصے تک یاد رکھا جائے گا۔