لاہورہائیکورٹ نے میشا شفیع کیخلاف 50 لاکھ ہرجانے کا فیصلہ مشروط طور پر معطل کر دیا

لاہور ہائیکورٹ کے جسٹس احمد ندیم ارشد نے میشا شفیع کی اپیل پر سماعت کی، جس میں ان کے وکیل ثاقب جیلانی پیش ہوئے۔ عدالت نے ٹرائل کورٹ کا فیصلہ مکمل طور پر معطل کرنے کی استدعا مسترد کرتے ہوئے اسے مشروط معطلی سے بدل دیا۔ عدالت نے حکم دیا کہ میشا شفیع ہرجانے کی آدھی رقم (25 لاکھ روپے) ہائیکورٹ میں جمع کروائیں اور بقیہ رقم کے لیے شورٹی بانڈ جمع کرائیں۔ سماعت کے دوران عدالت نے ٹرائل کورٹ کے اس حکم کو برقرار رکھا جس میں میشا شفیع کو دوبارہ جنسی ہراسانی کے الزامات لگانے سے روکا گیا تھا، اور ریمارکس دیے کہ کسی کو دوبارہ ایسے الزامات لگانے کی اجازت نہیں دی جا سکتی۔ عدالت نے علی ظفر کو نوٹس جاری کرتے ہوئے جواب طلب کر لیا ہے۔