کرکٹر محمد رضوان کی این سی سی آئی اے انکوائری کے خلاف درخواست خارج

لاہور ہائیکورٹ نے قومی کرکٹر محمد رضوان کی نیشنل سائبر کرائم انویسٹی گیشن ایجنسی (NCCIA) کی انکوائری اور کال اپ نوٹس کے خلاف دائر درخواست کو خارج کرتے ہوئے 5 صفحات پر مشتمل تفصیلی تحریری فیصلہ جاری کر دیا ہے۔ چیف جسٹس عالیہ نیلم کی جانب سے جاری فیصلے میں محمد رضوان کو این سی سی آئی اے کی انکوائری میں شامل ہونے اور مکمل تعاون کی ہدایت کی گئی ہے، جبکہ ایجنسی کو قانون کے مطابق کارروائی کرنے اور کھلاڑی کو ہراساں نہ کرنے کا حکم دیا گیا ہے۔ تحریری فیصلے کے مطابق سرکاری وکیل اور این سی سی آئی اے کا موقف ہے کہ یہ معاملہ پیکا (PECA) ایکٹ 2016ء کی دفعہ 14 (الیکٹرانک فراڈ اور ناجائز مالی فائدے) کے زمرے میں آتا ہے جو سائبر پٹرولنگ کے دوران سامنے آیا۔

عدالت نے کرکٹر کے وکیل کی اس دلیل کو رد کر دیا کہ معاملہ صرف آئی سی سی (ICC) کے اینٹی کرپشن یونٹ کا ہے، اور قرار دیا کہ آئی سی سی کوڈ محض ایک پیشہ ورانہ ضابطہ اخلاق ہے جو ریاستی اور قانون نافذ کرنے والے اداروں کو کارروائی سے نہیں روک سکتا۔ چیف جسٹس نے فیصلے میں لکھا کہ کال اپ نوٹس بذاتِ خود جرم عائد نہیں کرتا بلکہ محض موقف جاننے کا ذریعہ ہے، اور چونکہ محمد رضوان 10 ستمبر کو پیش ہو کر 14 ستمبر کو اپنا تحریری جواب جمع کرا چکے ہیں، اس لیے ایجنسی کی انکوائری نہ تو دائرہ اختیار سے باہر ہے اور نہ ہی بدنیتی پر مبنی۔ عدالت نے واضح کیا کہ انکوائری کے حتمی نتیجے سے کسی بھی شکایت کی صورت میں درخواست گزار قانون کے مطابق مناسب داد رسی کا طریقہ کار اختیار کر سکتے ہیں۔