تماشائیوں کا انوکھا احتجاج، کاغذ کے جہاز پھینک کر میچ ختم کروا دیا

اسپینش فٹبال لیگ لالیگا (La Liga) میں رایو ویلیکانو اور ایتھلیٹک بلباؤ کے درمیان کھیلا جانے والا اہم میچ تماشائیوں کے انوکھے اور شدید احتجاج کے باعث منسوخ کر دیا گیا۔ ہفتے کے روز رایو ویلیکانو کے ہوم گراؤنڈ پر انٹرنیشنل بریک کے بعد کھیلے گئے اس مقابلے کے 13ویں منٹ میں، جب دونوں ٹیمیں بغیر کسی گول کے برابر تھیں، شائقین نے کلب کے مالک کے انتظامی فیصلوں کے خلاف احتجاج کرتے ہوئے میدان میں یکبارگی ہزاروں کاغذی جہاز (Paper Planes) اور دیگر اشیا پھینکنا شروع کر دیں۔

میچ ریفری نے گراؤنڈ میں کاغذی جہازوں کا ڈھیر لگنے پر کھیل فوراً روک دیا اور صفائی کے لیے 10 منٹ کا وقفہ لیا گیا، جس دوران اسٹیڈیم انتظامیہ نے شائقین کو خبردار بھی کیا کہ خلل جاری رہنے پر میچ منسوخ کیا جا سکتا ہے۔ کھیل دوبارہ شروع ہونے کے کچھ ہی دیر بعد، 25ویں منٹ میں شائقین کی جانب سے ایک بار پھر کاغذی جہازوں کی برسات کر دی گئی، جس پر ریفری نے میچ حتمی طور پر ختم کرنے کا فیصلہ کر لیا۔ واقعہ کے بعد شائقین تیزی سے اسٹیڈیم خالی کر گئے، جبکہ رایو ویلیکانو انتظامیہ نے سوشل میڈیا پلیٹ فارم ایکس (ٹوئٹر) پر باقاعدہ پیغام جاری کرتے ہوئے میچ کی منسوخی کی تصدیق کی ہے۔