کریتی سنن مبینہ بوائے فرینڈ کیساتھ کرکٹ میچ دیکھنے اسٹیڈیم پہنچ گئیں، تصاویر وائرل

بالی ووڈ کی معروف اداکارہ کریتی سنن ایک بار پھر اپنے مبینہ بوائے فرینڈ کبیر باہیا کے ساتھ دیکھی گئی ہیں، جس کے بعد دونوں کے درمیان قریبی تعلقات کی افواہیں سوشل میڈیا پر ایک بار پھر گرم ہو گئی ہیں۔ کریتی سنن برمنگھم کے تاریخی ایجبسٹن اسٹیڈیم میں بھارت اور انگلینڈ کے درمیان کھیلے گئے پہلے ون ڈے میچ کے دوران کبیر باہیا کے ہمراہ میچ کا لطف اٹھاتی ہوئی نظر آئیں۔ میچ کے دوران کبیر باہیا نے اپنے آفیشل انسٹاگرام اکاؤنٹ پر کریتی سنن اور اپنے ایک دوست کے ساتھ تصاویر شیئر کیں، جو دیکھتے ہی دیکھتے انٹرنیٹ پر وائرل ہو گئیں۔ اسٹیڈیم میں کریتی سنن سبز رنگ کے دلکش ٹاپ اور سفید ٹراؤزر میں خوبصورت نظر آئیں جبکہ کبیر نے بھورے رنگ کی کلاسک جیکٹ زیب تن کر رکھی تھی۔ ان تصاویر کے منظرِ عام پر آتے ہی دونوں کے مداحوں کی جانب سے ان کے مبینہ رشتے کے حوالے سے دلچسپ تبصرے اور چہ مگوئیاں عروج پر پہنچ گئی ہیں۔