خیبرپختونخوا میں دریاؤں کے کنارے سونے کی غیر قانونی تلاش پر پابندی عائد

پشاور: محکمہ داخلہ خیبر پختونخوا نے صوبائی کابینہ کے فیصلے کی روشنی میں صوبے کے بڑے دریاؤں کے کناروں پر سونے کی غیر قانونی تلاش اور ہر قسم کی کان کنی پر فوری پابندی عائد کر دی ہے۔ یہ پابندی ابتدائی طور پر 60 روز کے لیے نافذ کی گئی ہے، جس کا مقصد آبی حیات کا تحفظ اور ماحولیاتی آلودگی کو روکنا ہے۔

سرکاری اعلامیے کے مطابق، اس پابندی کا اطلاق دریائے کابل، دریائے سوات اور دریائے سندھ پر ہوگا۔ متعلقہ اضلاع جن میں صوابی، سوات، نوشہرہ، کوہاٹ اور کرک شامل ہیں، کے ڈپٹی کمشنرز کو سختی سے ہدایت کی گئی ہے کہ وہ اپنے اپنے حدود میں اس فیصلے پر عمل درآمد کو یقینی بنائیں۔

حکام کا کہنا ہے کہ غیر قانونی کھدائی نہ صرف دریاؤں کے فطری بہاؤ کو متاثر کر رہی ہے بلکہ اس سے زمینی کٹاؤ (Soil Erosion) اور پانی کی آلودگی میں بھی خطرناک حد تک اضافہ ہو رہا ہے۔ مزید برآں، ان سرگرمیوں سے مقامی سطح پر امن و امان کی صورتحال بگڑنے کا بھی خدشہ ظاہر کیا گیا ہے۔