لاہور ہائیکورٹ کے احاطے میں ویڈیوز، تصاویر اور ٹک ٹاک بنانے پر پابندی

لاہور ہائیکورٹ نے عدالتی احاطے میں ڈیوائسز اور موبائل فون سے ویڈیوز بنانے، تصاویر کھینچنے اور ٹک ٹاک مواد ریکارڈ کرنے پر مکمل پابندی عائد کر دی ہے۔ چیف جسٹس لاہور ہائیکورٹ مس عالیہ نیلم کی منظوری کے بعد رجسٹرار عبدالرحیم کی جانب سے جاری کردہ باضابطہ سرکلر میں تمام وکلائے کرام، سائلین، پولیس اہلکاروں، عدالت کے عملے اور صحافیوں کو پابندی پر سختی سے عملدرآمد کرنے کی ہدایت کی گئی ہے۔

سرکلر کے متن کے مطابق عدالتی کمرہ جات، راہداریوں، دفاتر، انتظار گاہوں اور احاطہ عدالت کے دیگر تمام مقامات پر کسی بھی قسم کی ویڈیو یا تصویر بنانے کی اجازت نہیں ہوگی، تاہم پریس اور میڈیا کے نمائندوں کے لیے مختص مخصوص پریس کارنر کو اس پابندی سے استثنیٰ حاصل ہوگا۔ ہائیکورٹ انتظامیہ نے خبردار کیا ہے کہ سرکلر کی خلاف ورزی کرنے والوں کے خلاف قانونی کارروائی کی جائے گی اور قانون کے تحت خلاف ورزی کے لیے استعمال ہونے والے موبائل فون یا ریکارڈنگ آلات ضبط کیے جا سکتے ہیں۔