سندھ حکومت کا 15 اکتوبر سے سرکاری گندم جاری کرنے کا فیصلہ

وزیراعلیٰ سندھ سید مراد علی شاہ نے صوبے میں آٹے کی قیمتیں مستحکم رکھنے اور عوام کو ریلیف فراہم کرنے کے لیے 15 اکتوبر سے 100 کلو گرام گندم کی بوری 12 ہزار 500 روپے کی سرکاری قیمت پر جاری کرنے کی منظوری دے دی ہے۔ وزیراعلیٰ کی زیر صدارت منعقدہ اعلیٰ سطحی اجلاس میں صوبائی وزراء، چیف سیکریٹری اور سیکریٹری خوراک سمیت دیگر حکام نے شرکت کی۔

اجلاس میں بتایا گیا کہ اس وقت صوبائی ذخائر میں 3 لاکھ 46 ہزار میٹرک ٹن سے زائد گندم موجود ہے، جبکہ پاسکو اور در آمد شدہ گندم شامل ہونے کے بعد مجموعی ذخائر 8 لاکھ 36 ہزار میٹرک ٹن سے تجاوز کر جائیں گے۔ اوپن مارکیٹ میں گندم کی قیمت 13,200 روپے فی 100 کلو اور آٹا 165 سے 170 روپے فی کلو تک پہنچنے کا نوٹس لیتے ہوئے وزیراعلیٰ نے ہدایت کی کہ سرکاری گندم کے اجرا کے بعد مارکیٹ کی سخت نگرانی کی جائے اور آٹے کی قیمتوں میں کمی کے اثرات براہِ راست عام صارفین تک پہنچائے جائیں۔