ایران کے لیڈر مارے جا چکے، کوئی نہیں جانتا ملک کون چلا رہا ہے: ڈونلڈ ٹرمپ

امریکی صدر ڈونلڈ ٹرمپ نے ایران کے ساتھ جاری 8 ماہ طویل عسکری تنازع پر گفتگو کرتے ہوئے دعویٰ کیا ہے کہ واشنگٹن اور عالمی برادری کے لیے سب سے بڑا معمہ یہ ہے کہ اس وقت ایران کی قیادت اور حکومتی باگ ڈور کون سنبھال رہا ہے۔ صحافیوں سے بات چیت کرتے ہوئے امریکی صدر نے کہا کہ جنگ کی شروعات میں ہی ایرانی رہنما مارے گئے اور ان کا ثانوی طبقہ بھی صفایا ہو چکا ہے، جس کے بعد اب کسی کو معلوم نہیں کہ تہران میں فیصلے کون کر رہا ہے۔

ٹرمپ نے دعویٰ کیا کہ سابق سپریم لیڈر آیت اللہ علی خامنہ ای 28 فروری کو حملے میں مارے گئے تھے اور ان کے بیٹے مجتبیٰ خامنہ ای جانشین بننے کے بعد زخمی ہونے کے باعث منظرِ عام سے غائب ہیں۔ دوسری جانب انہوں نے موقف اختیار کیا کہ امریکہ خطے سے عالمی سطح پر تیل کی ترسیل کو جنگ سے پہلے کی سطح پر واپس لانے کے لیے پرعزم ہے، جبکہ ایرانی حکام تسلیم کر رہے ہیں کہ ان کی معیشت اور ایندھن کے ذخائر شدید بحران کا شکار ہو چکے ہیں۔ ایرانی دفترِ خارجہ نے ٹرمپ کے بیانات کو مسترد کرتے ہوئے کہا ہے کہ تہران کا حکومتی نظام مکمل طور پر فعال ہے۔