وزیراعلیٰ سندھ نے ڈی جی آئی ایس پی آر کا سعودیہ سے متعلق بیان خوش آئند قرار دیدیا

وزیراعلیٰ سندھ سید مراد علی شاہ نے کہا ہے کہ پاکستان اور سعودی عرب کے دفاعی اور تزویراتی تعلقات کے حوالے سے ڈائریکٹر جنرل آئی ایس پی آر (DG ISPR) کا جاری کردہ تفصیلی بیان انتہائی خوش آئند اور وقت کی ضرورت ہے۔ انہوں نے کہا کہ سعودی عرب میں پاکستانی فوجی دستوں کی موجودگی کسی نئی پیشرفت کے بجائے دہائیوں پر محیط تاریخی دفاعی معاہدوں اور باہمی تعاون کا تسلسل ہے۔

مراد علی شاہ نے زور دے کر کہا کہ پاک سعودی تعلقات محض رواں سفارتی تعلقات نہیں بلکہ عقیدت اور دلوں کے رشتے ہیں، جو ہر مشکل وقت اور کسوٹی پر پورا اترے ہیں۔ انہوں نے کہا کہ ‘مکہ الائنس’ کے تحت اور برادر ملک کی سلامتی و خودمختاری کا دفاع پاکستان کے لیے ہمیشہ سے اولین ترجیح رہا ہے اور سعودی عرب کی سلامتی و استحکام پاکستان کی اپنی سلامتی سے جڑا ہوا ہے۔ وزیراعلیٰ سندھ نے کہا کہ سندھ کے عوام اور حکومت دوطرفہ تاریخی و دفاعی رشتوں کو قدر کی نگاہ سے دیکھتے ہیں۔