آئی ایم ایف کے اعتراضات برقرار، آٹو پالیسی پر تاحال فیصلہ نہ ہوسکا

بین الاقوامی مالیاتی فنڈ (IMF) اور پاکستان کے درمیان جاری مذاکرات میں نئی آٹو پالیسی سے متعلق آئی ایم ایف کے اعتراضات تاحال دور نہیں ہو سکے ہیں۔ وزارتِ خزانہ کے ذرائع کے مطابق حکومت 2 کروڑ روپے (یا 75 ہزار ڈالر) تک کی مالیت والی الیکٹرک گاڑیوں (EVs) پر سیلز ٹیکس 1 فیصد سے بڑھا کر 18 فیصد کرنے کی شرط سے متعلق اب تک کوئی حتمی فیصلہ نہیں کر سکی ہے۔

حکومتی نمائندوں نے آئی ایم ایف کو آٹو پالیسی کے اہداف پر بریفنگ دیتے ہوئے موقف اختیار کیا کہ الیکٹرک گاڑیوں پر سیلز ٹیکس میں رعایت دینے کا بنیادی مقصد ملک میں ماحول دوست گاڑیوں کی ترویج اور ایندھن کے در آمدی بل میں کمی لانا ہے۔ بریفنگ میں آئی ایم ایف کو یہ یقین دہانی بھی کرائی گئی کہ اس اسکیم کے تحت طے شدہ گاڑیوں کی مالیت ایک سال تک تبدیل نہیں ہوگی۔ دوسری جانب وزارتِ انڈسٹریز اینڈ پروڈکشن کے ذرائع کا کہنا ہے کہ نئی آٹو پالیسی اور ٹیکسز کے ڈھانچے پر آئی ایم ایف کے ساتھ تکنیکی مذاکرات کا سلسلہ جاری رہے گا۔