وزیراعظم شہباز شریف کی ایم ایل ون منصوبہ تیزی سے آگے بڑھانے کی ہدایت

وزیراعظم شہباز شریف نے پاکستان ریلوے کی کارپوریٹ طرز پر اصلاحات اور سی پیک کے تحت تاریخی مین لائن ون (ML-1) منصوبے پر پیش رفت تیز کرنے کی سخت ہدایت جاری کی ہے۔ اسلام آباد میں منعقدہ اعلیٰ سطحی جائزہ اجلاس کی صدارت کرتے ہوئے وزیراعظم نے ریلوے کو ایک مضبوط، منافع بخش اور مالی طور پر خود کفیل ادارہ بنانے پر زور دیا۔ اجلاس میں وفاقی وزراء احسن اقبال، احد خان چیمہ، محمد اورنگزیب، حنیف عباسی، چیئرمین نیب اور گورنر اسٹیٹ بینک نے بھی شرکت کی۔

اجلاس کے دوران وزیراعظم نے ریلوے کی واگزار کرائی گئی اراضی کو کمرشل بنیادوں پر استعمال کرتے ہوئے ایم ایل ون (ML-1) کی تعمیر کے لیے بینک فنڈنگ حاصل کرنے کی اصولی منظوری دی، اور حکام کو دو ہفتوں کے اندر جامع منصوبہ پیش کرنے کا حکم دیا۔ بریفنگ میں بتایا گیا کہ 1,726 کلومیٹر طویل ایم ایل ون منصوبے کو چار سیکشنز (کراچی-روہڑی، روہڑی-ملتان، ملتان-لاہور، اور لاہور-پشاور) میں تقسیم کیا گیا ہے، جس میں سے کراچی-روہڑی سیکشن کے لیے بین الاقوامی فنانسنگ سے استفادہ کیا جائے گا جبکہ دیگر حصوں کی فنانسنگ مقامی وسائل کے ذریعے کی جائے گی