اسرائیل کو خانہ جنگی یا مکمل ریاستی خاتمے کا سامنا ہوسکتا ہے، سی آئی اے رپورٹ

امریکی تحقیقاتی ادارے ’ڈراپ سائٹ نیوز‘ (Drop Site News) کی سنسنی خیز رپورٹ کے مطابق امریکی خفیہ ایجنسی سی آئی اے (CIA) کے خصوصی تجزیاتی شعبے ‘ریڈ سیل’ نے اسرائیل کے مستقبل سے متعلق ایک حساس رپورٹ تیار کی ہے۔ ”فریکچر فرام وِد اِن“ (Fracture From Within) کے عنوان سے تیار کی گئی اس غیر علانیہ خفیہ رپورٹ میں دعویٰ کیا گیا ہے کہ اسرائیل سنگین سیاسی، معاشی اور سماجی تقسیم کی وجہ سے اندرونی خانہ جنگی یا ریاستی نظام کے مکمل خاتمے کے خطرے سے دوچار ہو سکتا ہے۔

جائزے کے مطابق غزہ، لبنان اور ایران میں طویل جنگوں، معاشی دباؤ، مہنگائی اور الٹرا آرتھوڈوکس یہودیوں کی اجباری فوجی سروس سے استثنیٰ کے تنازع نے اسرائیلی معاشرے میں دراڑیں مزید گہری کر دی ہیں۔ رپورٹ میں بتایا گیا ہے کہ جنگ سے لوٹنے والے ہزاروں ریزرو فوجیوں میں شدید نفسیاتی دباؤ اور وزیراعظم بنیامین نیتن یاہو کی سیاسی بقا کی کوششوں کے باعث پیدا ہونے والا آئینی بحران ملک کو عدم استحکام کی طرف دھکیل رہا ہے۔ مزید برآں، مقبوضہ مغربی کنارے میں یہودی آبادکاروں کے بڑھتے تشدد، عالمی سطح پر بڑھتی تنہائی اور امریکہ میں اسرائیل کی حمایت میں کمی کو بھی اس بحران کے کلیدی عوامل قرار دیا گیا ہے۔