ملک میں چھوٹے کاروباروں کے قرضوں کا حجم ایک ہزار 137 ارب روپے سے تجاوز کر گیا

وفاقی وزیر خزانہ و امورِ اقتصادیات محمد اورنگزیب کی زیر صدارت مالیاتی امور سے متعلق اسٹیئرنگ کمیٹی کے پانچویں اجلاس میں انکشاف ہوا ہے کہ ملک میں چھوٹے و درمیانے درجے کے کاروباروں (SMEs) کے لیے جاری کردہ قرضوں کا مجموعی حجم 1,137 ارب روپے سے تجاوز کر گیا ہے، جبکہ قرض حاصل کرنے والے کاروباروں کی تعداد 3 لاکھ 50 ہزار 862 تک پہنچ گئی ہے۔ اجلاس میں جون 2028ء تک چھوٹے کاروباروں کے لیے قرضوں کا حجم 2 ہزار ارب روپے اور مقروضین کی تعداد 7 لاکھ 75 ہزار تک بڑھانے کے ہدف کی توثیق کی گئی۔

اجلاس کو بریفنگ میں بتایا گیا کہ زرعی قرضوں کے شعبے میں 94 ارب 70 کروڑ روپے کا اضافہ ہوا جس سے زرعی قرضوں کا حجم 1,350 ارب روپے سے تجاوز کر گیا، جبکہ ’اپنا گھر پروگرام‘ کے تحت ہاؤسنگ فنانسنگ کا حجم 426 ارب روپے تک پہنچ چکا ہے۔ اس کے علاوہ الیکٹرک گاڑیوں کی اسکیم (EV) کے تحت 2 ارب 54 کروڑ روپے کی 17,262 درخواستیں منظور کی گئی ہیں۔ وزیر خزانہ نے ہدایت کی کہ سرکاری معاونت سے چلنے والی تمام قرضہ اسکیمیں تجارتی طور پر پائیدار ہونی چاہئیں اور نجی شعبے کی شمولیت سے مویشی بانی، زراعت اور سستے گھروں کی فراہمی میں مزید فنڈنگ یقینی بنائی جائے۔