خیبرپختونخوا حکومت کا کھیلوں کی سہولیات آؤٹ سورس کرنے کا فیصلہ

خیبرپختونخوا حکومت نے ہسپتالوں اور سکولوں کے انتظامی امور میں بہتری کے بعد اب صوبے کی سرکاری کھیلوں کی سہولیات بھی نجی شعبے (آؤٹ سورسنگ) کے سپرد کرنے کا فیصلہ کر لیا ہے۔ اس سلسلے میں حیات آباد سپورٹس کمپلیکس اور پشاور سپورٹس کمپلیکس کی آؤٹ سورسنگ کے لیے باقاعدہ ٹینڈر جاری کر دیے گئے ہیں، جبکہ ان کی دیکھ بھال اور انتظام سنبھالنے کے لیے نجی شعبے سے پری کوالیفکیشن درخواستیں بھی طلب کر لی گئی ہیں۔ حکام کے مطابق پہلے مرحلے میں ہاکی گراؤنڈ، سکواش اور ٹینس کورٹس، سوئمنگ پول، باسکٹ بال کورٹ اور بیڈمنٹن ہال سمیت اہم سہولیات ابتدائی طور پر 5 سال کے لیے نجی کمپنیاں یا ادارے کے حوالے کیے جائیں گے۔ معاہدے کے تحت تسلی بخش کارکردگی کی صورت میں آؤٹ سورسنگ کی مدت میں مزید 5 سال کی توسیع بھی کی جا سکے گی، جس کا مقصد کھیل کے میدانوں کی بہتر نگہداشت اور شائقین کو معیاری سہولیات کی فراہمی ہے۔