خوشدل شاہ کا پاکستان کرکٹ چھوڑنے پر بیان سامنے آگیا

قومی کرکٹ ٹیم کے آل راؤنڈر خوشدل شاہ نے پاکستان کرکٹ چھوڑ کر امریکا منتقل ہونے کی خبروں پر خاموشی توڑتے ہوئے تفصیلی وضاحت پیش کر دی ہے۔

تفصیلات کے مطابق گزشتہ کچھ دنوں سے سوشل میڈیا پر یہ خبریں تیزی سے گردش کر رہی تھیں کہ خوشدل شاہ نے پاکستان کرکٹ چھوڑ کر امریکا کی جانب سے کھیلنے کا فیصلہ کر لیا ہے۔ تاہم، آل راؤنڈر نے سماجی رابطے کی ویب سائٹ ایکس (ٹوئٹر) پر جاری اپنے پیغام میں ان تمام خبروں کو مکمل طور پر جھوٹا اور من گھڑت قرار دے کر مسترد کر دیا ہے۔

خوشدل شاہ نے اپنے بیان میں کہا، “میرے پاکستان کرکٹ چھوڑنے سے متعلق انتہائی بے بنیاد خبریں پھیلائی جا رہی ہیں۔ پاکستان میرا گھر ہے اور اپنے ملک کی نمائندگی کرنا ہمیشہ سے میری اولین ترجیح اور سب سے بڑا اعزاز رہا ہے۔”

انہوں نے مداحوں اور میڈیا سے اپیل کرتے ہوئے کہا کہ برائے مہربانی ان بے بنیاد افواہوں پر بالکل بھی یقین نہ کریں۔ پاکستان کرکٹ کے ساتھ ان کی وابستگی اور محبت میں نہ پہلے کبھی کمی آئی تھی اور نہ آئندہ کبھی آئے گی۔