جو دہلی کے ساتھ کیا، وہی کابل کے ساتھ کریں گے: خواجہ آصف

وفاقی وزیرِ دفاع خواجہ آصف نے افغانستان کی طالبان حکومت کو کڑی تنقید کا نشانہ بناتے ہوئے خبردار کیا ہے کہ اگر کابل نے اپنی روش نہ بدلی تو پاکستان وہی جواب دے گا جو روایتی حریف بھارت (دہلی) کو دیا جاتا رہا ہے۔ قومی اسمبلی میں اظہارِ خیال کرتے ہوئے انہوں نے دوٹوک الفاظ میں کہا کہ کابل حکومت اس وقت بھارت کی “پراکسی” بنی ہوئی ہے اور دہشت گردی روکنے کے حوالے سے پاکستان کو ٹھوس یقینی دہانی کروانے میں ناکام رہی ہے۔ وزیرِ دفاع کا کہنا تھا کہ پاکستان کے لیے اس وقت مشرقی اور مغربی دونوں سرحدوں پر ایک ہی دشمن ہے اور دہلی و کابل میں اب کوئی فرق باقی نہیں رہا۔

خواجہ آصف نے انکشاف کیا کہ پاکستان نے قطر، سعودی عرب اور ترکیہ جیسے دوست ممالک کے ساتھ مل کر افغان حکومت کو سمجھانے اور مذاکرات کی بھرپور کوشش کی، لیکن مطلوبہ نتائج حاصل نہ ہو سکے۔ انہوں نے پاک فوج کی قربانیوں کو خراجِ تحسین پیش کرتے ہوئے کہا کہ ہمارے جوان سرحدوں پر غیر مشروط جانیں نچھاور کر رہے ہیں۔ انہوں نے خیبر پختونخوا حکومت کے حوالے سے کہا کہ طویل عرصے تک تعاون میسر نہیں تھا مگر اب صورتحال بہتر ہے، تاہم انہوں نے افسوس ظاہر کیا کہ ‘معرکہ حق’ جیسی اہم تقریب میں مدعو کیے جانے کے باوجود بعض بااثر حلقوں نے شرکت نہیں کی۔