پاکستان جونیئر ہاکی ٹیم ملائیشیا کو ہرا کر سیمی فائنل میں پہنچ گئی

چین میں جاری جونیئر مینز ہاکی ایشیا کپ کے انتہائی اہم میچ میں قومی جونیئر ٹیم نے شاندار کم بیک کرتے ہوئے ملائیشیا کو 2 کے مقابلے میں 5 گول سے عبرتناک شکست دے کر ایونٹ کے سیمی فائنل کے لیے کوالیفائی کر لیا ہے۔ پول ‘بی’ کے اس سنسنی خیز مقابلے کے پہلے ہاف کے 9ویں منٹ میں ملائیشیا کے محمد صالحی نے فیلڈ گول کر کے اپنی ٹیم کو 0-1 کی برتری دلائی جو پہلے ہاف کے اختتام تک برقرار رہی۔

تاہم، دوسرے ہاف کے تیسرے کوارٹر میں پاکستانی کھلاڑیوں نے جارحانہ کھیل کا مظاہرہ کرتے ہوئے منٹوں میں چار گول داغ کر میچ کا نقشہ ہی بدل دیا۔ 32ویں منٹ میں ندیم خان نے گول کر کے مقابلہ 1-1 سے برابر کیا، جبکہ 36ویں منٹ میں عبداللہ سمیع رانا کے گول نے پاکستان کو 1-2 کی برتری دلا دی۔ اس کے بعد پاکستان کے رانا ولید نے 39ویں اور 40ویں منٹ میں مسلسل دو گول کر کے ٹیم کی گرفت مضبوط کر دی، اور 41ویں منٹ میں علی حمزہ نے پانچواں گول داغ کر اسکور 1-5 کر دیا۔ ملائیشیا کے گناسیلن دھیرش نے 54ویں منٹ میں دوسرا گول کر کے خسارہ کم کرنے کی کوشش کی، تاہم میچ کا اختتام پاکستان کی 2-5 سے فاتحانہ کامیابی پر ہوا اور علی حمزہ کو ‘مین آف دی میچ’ قرار دیا گیا۔ ایونٹ میں مسلسل تیسری فتح کے بعد پاکستان ہاکی فیڈریشن کے صدر محی الدین احمد وانی نے قومی ٹیم اور مینجمنٹ کو دلنشین کامیابی پر مبارکباد دی