نوجوانوں سے ملکر ظالمانہ نظام بدلیں گے: حافظ نعیم الرحمان

امیر جماعت اسلامی حافظ نعیم الرحمان نے کہا ہے کہ نوجوانوں کے ساتھ مل کر ملک میں مسلط ظالمانہ نظام کو تبدیل کریں گے اور عوام کی خدمت کے لیے عملی منصوبے پیش کیے جائیں گے۔

کراچی میں ختم بخاری شریف کی تقریب سے خطاب کرتے ہوئے حافظ نعیم الرحمان نے کہا کہ اسرائیلی وزیر اعظم نیتن یاہو دہشت گرد ہے جس نے غزہ میں ہزاروں بچوں کو شہید کیا، جبکہ امریکا کے سابق صدر ڈونلڈ ٹرمپ کی سرپرستی اسے حاصل رہی۔

انہوں نے کہا کہ سندھ پر وڈیروں اور جاگیرداروں نے قبضہ جما رکھا ہے، صوبے میں ہزاروں بچے تعلیم سے محروم ہیں۔ سندھ حکومت واضح کرے کہ صوبے کے وسائل کہاں جا رہے ہیں، عوام کے حصے کے اربوں روپے کرپشن کی نذر ہو رہے ہیں۔

امیر جماعت اسلامی نے کہا کہ سندھ کا حق سندھ کو اور پنجاب کا حق پنجاب کو ملنا چاہیے، اب بہت ہو چکا، جماعت اسلامی مکمل منصوبہ بندی کے ساتھ عوام کی خدمت کے لیے میدان میں اترے گی۔

حافظ نعیم الرحمان نے مزید کہا کہ نوجوان نسل کو ساتھ لے کر فری آئی ٹی کورسز کا آغاز کیا جائے گا اور بچوں کو تعلیم کے زیور سے آراستہ کیا جائے گا تاکہ ایک منصفانہ اور خوشحال معاشرہ تشکیل دیا جا سکے۔