جاپان: اداکار کے چہرے والی لیٹس نے سب کی توجہ حاصل کرلی

جاپان کے دارالحکومت ٹوکیو کی سپر مارکیٹوں میں خوراک کے ضیاع سے بچاؤ کے لیے ایک انوکھی اور تخلیقی مہم شروع کی گئی ہے، جس میں لیٹس (سلاد کے پتے) کی پیکنگ پر معروف جاپانی اداکار تاتسویا فوجیوارا کا چہرہ چھاپا گیا ہے۔ یہ منفرد اقدام فوڈ کمپنی اجینوموٹو نے زرعی تعاون تنظیم کے ساتھ مل کر شروع کیا ہے۔ اعداد و شمار کے مطابق جاپان میں گرمیوں میں پیداوار بڑھنے پر 60 فیصد سے زائد لوگ لیٹس کے خراب ہونے پر اسے ضائع کر دیتے ہیں۔ اداکار نے سوشل میڈیا پلیٹ فارم ایکس (سابقہ ٹوئٹر) پر مزاحیہ انداز میں بتایا کہ لیٹس کے اس بحران کو حل کرنے کے لیے انہوں نے اپنی تصویر استعمال کرنے کی اجازت دی تاکہ خریداروں کی توجہ اس مسئلے کی جانب مبذول کرائی جا سکے۔ سوشل میڈیا پر وائرل ہونے والی اس مہم کو جاپان بھر میں بے حد پذیرائی مل رہی ہے۔