اننت امبانی کی 13 کروڑ سے زائد مالیت کی گھڑی میں خاص کیا ہے؟

نیویارک کی معروف کمپنی جیکب اینڈ کمپنی نے بھارتی صنعتکار اننت امبانی کے لیے ایک نایاب اور خصوصی لگژری گھڑی تیار کی ہے۔ اس گھڑی کی قیمت تقریباً ڈیڑھ ملین ڈالر (13 کروڑ پاکستانی روپے سے زائد) بتائی گئی ہے۔

گھڑی کو Opera Vantara Green Camo کا نام دیا گیا ہے، جس کے ڈائل پر اننت امبانی کا ننھا مجسمہ نصب ہے۔ ساتھ ہی شیر اور بنگال ٹائیگر کے ننھے مجسمے بھی موجود ہیں، جو اننت امبانی کے جانوروں کے تحفظ کے منصوبے ونتارا سے متاثر ہیں۔

یہ گھڑی 18 قیراط سفید سونے کے کیس میں تیار کی گئی ہے اور اس میں 397 قیمتی پتھر جڑے گئے ہیں، جن کا مجموعی وزن تقریباً 21.98 قیراط ہے۔ سبز کیموفلاج ڈیزائن اور باریک کاریگری نے اسے ایک منفرد شاہکار بنا دیا ہے۔

سوشل میڈیا پر گھڑی کی شاہانہ شان اور ماحولیات کے پیغام پر حیرت کا اظہار کیا جا رہا ہے، اور لگژری اشیا کے شوقین افراد کے لیے یہ موضوع گفتگو بن چکا ہے۔