سندھ طاس معاہدے کی پاسداری علاقائی امن و استحکام کیلئے ضروری ہے: اسحاق ڈار

واشنگٹن: نائب وزیراعظم و وزیرِ خارجہ سینٹر محمد اسحاق ڈار نے کہا ہے کہ پاکستان اور بھارت کے درمیان 1960ء سے قائم سندھ طاس معاہدہ (Indus Waters Treaty) صرف ایک روایتی معاہدہ نہیں بلکہ خطے کی آبی و اقتصادی سلامتی کے لیے ایک بنیادی قانونی فریم ورک ہے، جس کی پاسداری علاقائی امن کے لیے انتہائی ضروری ہے۔

امریکہ میں پاکستانی سفارتخانے کے زیراہتمام سندھ طاس معاہدے کے موضوع پر منعقدہ سیمینار سے ورچوئل خطاب کرتے ہوئے اسحاق ڈار نے کہا کہ عالمی بینک کی ثالثی میں طے پانے والا یہ تاریخی معاہدہ کئی دہائیوں سے دونوں ممالک کے درمیان آبی وسائل کی تقسیم کی قانونی بنیاد فراہم کر رہا ہے۔ انہوں نے زور دیا کہ پانی انسانی زندگی، غذائی تحفظ اور معاشی پائیداری کی بنیادی ضرورت ہے، اور بین الریاستی آبی تقسیم کو ہمیشہ عالمی قوانین اور معاہدوں کے تحت ہی برقرار رکھا جانا چاہیے۔

نائب وزیراعظم نے اپنے خطاب میں واضح کیا کہ پاکستان اپنے تاریخی اور قانوناً تفویض کردہ آبی حقوق کے مکمل تحفظ کے لیے عالمی قوانین، سفارتی ذرائع اور بین الاقوامی فورمز پر اپنا مؤثر مؤقف اجاگر کرتا رہے گا۔ انہوں نے اس بات پر اعادہ کیا کہ معاہدے کی بلا تعطل پاسداری ہی ریاستوں کے درمیان اعتماد کی بحالی اور جنوبی ایشیا میں پائیدار امن کی ضامن ہے۔