امریکا پوری ایرانی قوم کی معاشی زندگی کو نشانہ بنا رہا ہے، اسماعیل بقائی

ایرانی وزارتِ خارجہ کے ترجمان اسماعیل بقائی نے امریکہ کو شدید تنقید کا نشانہ بناتے ہوئے کہا ہے کہ واشنگٹن حکومت پوری ایرانی قوم کی معاشی زندگی کو تباہ کرنے کی مذموم کوشش کر رہی ہے۔ ان کا کہنا تھا کہ ایرانی عوام کو شدید معاشی نقصان پہنچانے اور ملک کی معیشت کو اپاہج کرنے کے لیے ایران پر باقاعدہ اقتصادی جنگ مسلط کی گئی ہے، جو انسانی حقوق کی کھلی خلاف ورزی ہے۔

اسماعیل بقائی نے امریکی پابندیوں کے بیانیے کو انتہائی کمزور اور بے بنیاد قرار دیتے ہوئے کہا کہ ان اقدامات سے واشنگٹن کی شاطرانہ اور منفی سوچ کھل کر دنیا کے سامنے آ گئی ہے۔ ایرانی وزارتِ خارجہ کے ترجمان نے مزید زور دے کر کہا کہ امریکہ، ایران کے خلاف بلاجواز اور غیر قانونی معاشی جنگ شروع کر کے عالمی سطح پر شدید شرمندگی اور سبکی کا سامنا کر رہا ہے، تاہم ایرانی قوم اس قسم کے دباؤ کے سامنے کبھی سر تسلیم خم نہیں کرے گی۔