پاکستان کیخلاف کسی سازش کو کامیاب نہیں ہونے دیں گے: سہیل آفریدی

وزیراعلیٰ خیبرپختونخوا محمد سہیل آفریدی نے کہا ہے کہ پاکستان ہم سب کا ملک ہے اور اس کے خلاف کی جانے والی کسی بھی قسم کی سازش کو ہرگز کامیاب نہیں ہونے دیا جائے گا۔ کوہاٹ میں دہشت گردوں کے خودکش حملے کی شدید الفاظ میں مذمت کرتے ہوئے ایک ویڈیو پیغام میں انہوں نے شہید پولیس اہلکاروں اور عام شہریوں کی مغفرت اور درجات کی بلندی کے لیے دعا کی۔ ان کا کہنا تھا کہ خیبرپختونخوا دہشت گردی کے خلاف جنگ میں پاکستان کا فرنٹ لائن صوبہ ہے، جس کے عوام اور فورسز نے ملک میں امن کے قیام کے لیے 80 ہزار سے زائد جانوں کا نذرانہ پیش کیا ہے اور انہی قربانیوں کی بدولت آج اسلام آباد سمیت پورا ملک محفوظ ہے۔

سہیل آفریدی نے زور دیا کہ خیبرپختونخوا کے عوام کی ان لازوال قربانیوں کی قدر کی جانی چاہیے کیونکہ عوامی جذبات کے خلاف کہے گئے الفاظ شہدا کی بے حرمتی کے مترادف ہیں۔ انہوں نے ملک کے سب سے بڑے صوبے کے وزیراعلیٰ کی جانب سے خیبرپختونخوا کے حوالے سے دیے گئے متنازع اور منفی بیانات کو شدید افسوسناک قرار دیا۔ وزیراعلیٰ کے پی نے واضح کیا کہ خیبرپختونخوا سمیت تمام صوبوں کے عوام پرخلوص اور محبِ وطن پاکستانی ہیں؛ لہٰذا صوبائی یا لسانی بنیادوں پر عوام میں تفریق، تعصب اور نفرت پیدا کرنے کی تمام تر سازشوں کو ناکام بنایا جائے گا۔