ٹرمپ اور نیتن یاہو کے اقتدار تک آبنائے ہرمز نہیں کھولی جائے گی، باقر ذوالقدر

ایرانی رہبرِ انقلاب کے سینئر سیاسی مشیر محمد باقر ذوالقدر نے انتہائی سخت موقف اختیار کرتے ہوئے اعلان کیا ہے کہ جب تک امریکی صدر ڈونلڈ ٹرمپ اور اسرائیلی وزیراعظم بنیامین نیتن یاہو اقتدار میں ہیں، عالمی تجارت کے لیے انتہائی اہم سمندری راستے ‘آبنائے ہرمز’ (Strait of Hormuz) کو نہیں کھولا جائے گا۔ ایرانی میڈیا کے مطابق، باقر ذوالقدر نے واضح کیا کہ آبنائے ہرمز کی مکمل بندش دراصل دشمن کی جارحیت کے خلاف ایرانی قوم کے سخت انتقام کا پہلا مرحلہ ہے۔

انہوں نے اپنے بیان میں زور دیا کہ اس وقت ایرانی قوم اپنے وجود، قومی شناخت، آزادی اور اعلیٰ سٹریٹجک اہداف کے دفاع کی جنگ لڑ رہی ہے۔ محمد باقر ذوالقدر کا مزید کہنا تھا کہ ایرانی قوم اور اس کی قیادت نے یہ پختہ ارادہ کر لیا ہے کہ وہ جارح دشمن کا بھرپور مقابلہ کرتے ہوئے ان کے دانت کھٹے کرے گی اور عالمی سامراجی قوتوں کو ہر محاذ پر ناکامی و شکست سے دوچار کرے گی۔