اپوسٹیل اور دستاویزات کی تصدیق کے نظام کی تحقیقات کیلئے انکوائری کمیٹی قائم

نائب وزیراعظم نے اپوسٹیل (Apostille) اور دستاویزات کی تصدیق کے نظام میں بدعنوانی و بے ضابطگیوں سے متعلق میڈیا رپورٹس کا فوری نوٹس لیتے ہوئے اعلیٰ سطحی تحقیقات کا حکم دے دیا ہے۔ وزارتِ خارجہ کے اٹسٹیشن سسٹم کی شفافیت کا جائزہ لینے اور تحقیقات مکمل کرنے کے لیے ایک 3 رکنی انکوائری کمیٹی قائم کر دی گئی ہے۔ جاری کردہ سرکاری نوٹیفکیشن کے مطابق سیکرٹری پٹرولیم حامد یعقوب شیخ اس انکوائری کمیٹی کے کنوینر ہوں گے، جبکہ سیکرٹری قانون راجہ نعیم اکبر اور اسپیشل سیکرٹری خزانہ قمر سرور عباسی اس کے دیگر ارکان میں شامل ہیں۔

یہ کمیٹی اپوسٹیل اور دستاویزات کی تصدیق کے عمل میں ہونے والے غلط استعمال اور بے ضابطگیوں کی نشاندہی کرے گی، کورئیر سروسز کے کردار کا تفصیلی جائزہ لے گی اور وزارتِ خارجہ کے افسران کی ممکنہ ملاوٹ یا کوتاہی کا تعین کرے گی۔ نوٹیفکیشن میں واضح کیا گیا ہے کہ کمیٹی اس اہم نظام میں شفافیت اور بہتری لانے کے لیے اصلاحات بھی تجویز کرے گی۔ انکوائری کمیٹی کو دو ہفتوں کے اندر اپنی تحریری سفارشات اور تحقیقاتی رپورٹ پیش کرنے کی ہدایت کی گئی ہے، جبکہ وزارتِ خارجہ کے ایڈیشنل سیکرٹری (ایڈمن) کمیٹی کو تمام متعلقہ ریکارڈز فراہم کرنے اور مکمل تعاون کے پابند ہوں گے۔