پاور سیکٹر اصلاحات، ریگولیٹری اداروں کی خودمختاری اور مؤثریت مضبوط بنانے پر غور

نائب وزیراعظم و وزیرِ خارجہ سناتور محمد اسحاق ڈار کی زیرِ صدارت پاور سیکٹر اصلاحات کے حوالے سے قائم کمیٹی کا دوسرا اہم اجلاس منعقد ہوا۔ ترجمان دفتر خارجہ کے مطابق اجلاس کے دوران پاور سیکٹر میں جاری نجکاری کے عمل کے تناظر میں ریگولیٹری اداروں کی خودمختاری، فعالیت اور مؤثریت کو مزید مضبوط بنانے کے لیے مختلف تدابیر اور اقدامات پر تفصیلی غور و خوض کیا گیا۔

اجلاس میں بجلی کے عام صارفین کے مفادات کے تحفظ کو یقینی بنانے اور پاور سیکٹر کی پائیدار بہتری کے لیے متعدد اہم سفارشات پر اتفاق رائے قائم کیا گیا۔ ترجمان کا کہنا ہے کہ ان حتمی سفارشات کی تیاری کے ساتھ ہی وزیراعظم پاکستان کی جانب سے اس کمیٹی کو سونپا گیا اہم mandate اور کام کامیابی سے مکمل ہو گیا ہے۔ کمیٹی کے چیئرمین نائب وزیراعظم اسحاق ڈار نے تمام اراکین کی کاوشوں کو سراہتے ہوئے ان کا شکریہ ادا کیا۔