افغان طالبان رجیم میں انسانی حقوق کی بدترین پامالیاں،عالمی سطح پر آوازیں اٹھنے لگیں

اقوام متحدہ میں آئرلینڈ کے مستقل مندوب کی جانب سے جاری کردہ اعلامیہ کے مطابق، آئرش وزیرِ انصاف جم اوکالاگھن نے اقوام متحدہ کی سلامتی کونسل کے اہم اجلاس میں تنازعات کے دوران جنسی تشدد کے خلاف آئرلینڈ کا اصولی مؤقف پیش کیا۔ اس موقع پر انہوں نے افغانستان کی موجودہ صورتحال پر بات کرتے ہوئے طالبان رجیم کو سخت تنقید کا نشانہ بنایا۔

آئرش وزیرِ انصاف نے سلامتی کونسل کے اجلاس سے خطاب میں کہا کہ قابض طالبان رجیم میں افغان عوام، بالخصوص خواتین کو تعلیم، صحت اور روزگار جیسے بنیادی ترین حقوق سے مستقل محروم رکھا جا رہا ہے۔ انہوں نے افغان طالبان کو آڑے ہاتھوں لیتے ہوئے واضح کیا کہ طالبان رجیم خواتین کی آزادیاں سلب کرنے کے لیے بدستور ‘صنفی تشدد’ کو ایک ہتھیار کے طور پر استعمال کر رہی ہے۔

دوسری جانب، آسٹریلوی صحافی آنہ کورین نے بھی طالبان انتظامیہ کے خواتین مخالف اقدامات کو شدید امتیازی قرار دیتے ہوئے اسے “خواتین کے خلاف جنگ” کا نام دیا ہے۔ انسانی حقوق کی تنظیموں اور بین الاقوامی مندوبین کا کہنا ہے کہ افغانستان میں طالبان کے تحت انسانی حقوق کی یہ سنگین پامالیاں اس بات کا واضح ثبوت ہیں کہ افغان عوام، بالخصوص خواتین اس وقت بدترین جبر اور مظالم کا شکار ہیں۔