ایران نے مجوزہ زمینی کارروائی کی سازش ابتدا میں ہی ناکام بنا دی، ابراہیم عزیزی

ایرانی پارلیمنٹ کی قومی سلامتی اور خارجہ پالیسی کمیٹی کے سربراہ ابراہیم عزیزی نے دعویٰ کیا ہے کہ ایران کے خلاف کی جانے والی ایک مجوزہ زمینی کارروائی کی سازش کو ابتدا ہی میں ناکام بنا دیا گیا ہے۔ اپنے ایک بیان میں انہوں نے بتایا کہ ایرانی فوجی یونٹس نے مقامی فورسز کی مدد سے مختلف سمتوں سے ہونے والے ایک منصوبہ بند زمینی حملے کو پسپا کیا۔ ابراہیم عزیزی نے امریکا کو سخت خبردار کرتے ہوئے کہا کہ وہ ایران کے خلاف اپنے اہداف حاصل کرنے میں ناکام رہا ہے اور اگر دوبارہ ملک کی سلامتی کو کوئی خطرہ لاحق ہوا تو ایران دنیا بھر میں امریکی اہداف کو نشانہ بنائے گا۔ انہوں نے مزید کہا کہ امریکا کو مکمل شکست ہونے تک نہیں بخشا جائے گا اور ایران اس کا پیچھا جاری رکھے گا۔