پنجاب حکومت کا انتظامی اخراجات کم کرنے کیلئے 101 آسامیاں ختم کرنے کا فیصلہ

پنجاب حکومت نے انتظامی اخراجات میں کمی اور محکموں کی تنظیم نو کے پالیسی اقدام کے تحت جنوبی پنجاب سیکرٹریٹ اور صوبائی انتظامی محکموں میں کل 101 آسامیاں ختم کرنے کی منظوری دے دی ہے، جس کا باقاعدہ نوٹیفکیشن ایڈیشنل چیف سیکرٹری پنجاب کی جانب سے جاری کر دیا گیا ہے۔ یہ فیصلہ محکمہ خزانہ کی سفارشات کی روشنی میں کیا گیا ہے۔ مرکزی محکموں میں سب سے زیادہ 6 آسامیاں سکول ایجوکیشن ڈیپارٹمنٹ کی ختم کی گئی ہیں، جبکہ محکمہ خزانہ، داخلہ، اور صحت سے متعلق محکموں کی 5، 5 آسامیاں ختم کی گئی ہیں۔ اسی طرح جنوبی پنجاب سیکرٹریٹ میں بھی مختلف شعبوں کے سیکشن افسران کی متعدد آسامیاں ختم کی گئی ہیں، جن میں ہیلتھ اینڈ پاپولیشن ڈیپارٹمنٹ کی سب سے زیادہ 8 آسامیاں شامل ہیں۔ نوٹیفکیشن جاری کرتے ہوئے تمام متعلقہ محکموں کو اس فیصلے پر فوری عملدرآمد اور ضروری کارروائی مکمل کرنے کی ہدایت کر دی گئی ہے۔