ایرانی ریال کی قدر میں تاریخی کمی، ایک امریکی ڈالر 13 لاکھ ریال تک پہنچ گیا

تہران: ایرانی کرنسی ریال کی قدر امریکی ڈالر کے مقابلے میں ریکارڈ نچلی سطح پر آ گئی ہے، جس کے بعد ایک امریکی ڈالر اب 13 لاکھ ایرانی ریال کے برابر ہو گیا ہے۔ ملک کو درپیش یہ مالیاتی بحران گزشتہ دو ہفتوں سے بھی کم عرصے میں مزید شدت اختیار کر گیا ہے۔

میڈیا رپورٹس کے مطابق، ایرانی کرنسی کی قدر میں مسلسل کمی کا یہ رجحان امریکہ کی جانب سے 2018 میں جوہری معاہدے سے یکطرفہ علیحدگی اختیار کرنے اور ملک پر سخت پابندیاں عائد کرنے کے بعد شروع ہوا تھا۔

یاد رہے کہ 2015 میں جب ایران کا عالمی طاقتوں کے ساتھ جوہری معاہدہ طے پایا تھا، تو اس وقت ایک امریکی ڈالر صرف 32,000 ایرانی ریال کے برابر تھا۔ تاہم، پابندیوں کے بعد صورتحال تیزی سے بگڑتی چلی گئی۔ تین دسمبر 2025 کو ایک امریکی ڈالر 12 لاکھ ایرانی ریال کا تھا، اور محض دو ہفتوں کے اندر یہ شرح مزید گر کر 13 لاکھ ریال تک پہنچ چکی ہے۔

کرنسی کی قدر میں اس تباہ کن کمی کی وجہ سے ایرانی عوام کو شدید افراطِ زر اور روزمرہ زندگی کے اخراجات میں بے تحاشا اضافے جیسے سنگین معاشی مسائل کا سامنا ہے۔