ایران جنگ کے باعث پاکستان کی بین الاقوامی پروازیں نصف رہ گئیں، گیلپ سروے

اسلام آباد: ایران میں جاری جنگ کے باعث پاکستان سے بین الاقوامی پروازوں میں تقریباً 50 فیصد کمی واقع ہوئی ہے۔ گیلپ پاکستان کے سروے کے مطابق مارچ کے آغاز میں بین الاقوامی پروازیں 1127 سے کم ہو کر 572 رہ گئی ہیں۔

سروے میں بتایا گیا کہ چند ہفتوں کے دوران پاکستان کی بین الاقوامی پروازوں کی نصف تعداد ختم ہو گئی، جس سے ایوی ایشن سیکٹر کو شدید دھچکا لگا۔ ایران اور خلیجی فضائی حدود کی بندش کے باعث متعدد فلائٹس منسوخ ہوئیں، کئی روٹس میں تبدیلی کی گئی اور فریکوئنسی بھی کم کر دی گئی۔

مشرق وسطیٰ کے روٹس پر انحصار کے باعث پاکستان کی پروازیں سب سے زیادہ متاثر ہوئیں، جبکہ دبئی سمیت دیگر خلیجی ممالک کے لیے فضائی سرگرمی میں نمایاں کمی دیکھی گئی۔ گیلپ سروے میں یہ بھی رپورٹ کیا گیا کہ سعودی عرب کے لیے پروازوں کا تناسب بڑھ گیا ہے، اور غیر ضروری سفر میں کمی دیکھی گئی، مگر مذہبی اور ضروری سفری سرگرمیاں جاری رہیں۔