ایرانی رہبر اعلیٰ شہید علی خامنہ ای کی نماز جنازہ تہران میں ادا، لاکھوں سوگواروں کی شرکت

ایران پر امریکی و اسرائیلی حملوں میں شہید ہونے والے سپریم لیڈر آیت اللہ سید علی خامنہ ای اور ان کے اہل خانہ کی پہلی نمازِ جنازہ تہران کے گرینڈ مصلیٰ کمپلیکس میں ادا کر دی گئی ہے۔ اس موقع پر تہران کی فضا انتہائی سوگوار اور ہر آنکھ اشکبار تھی۔

ایرانی میڈیا کے مطابق، شہید سپریم لیڈر کی نمازِ جنازہ معروف عالمِ دین آیت اللہ جعفر سبحانی نے پڑھائی۔ نمازِ جنازہ کی یہ روح فرسا تقریب تین مراحل میں ادا کی گئی؛ پہلے مرحلے میں رہبرِ اعلیٰ علی خامنہ ای، دوسرے مرحلے میں ان کی بیٹی بشریٰ خامنہ ای، داماد مصباح الہدیٰ باقری اور بہو زہرا حداد عادل، جبکہ تیسرے مرحلے میں شہید سپریم لیڈر کی کمسن نواسی زہرا محمدی کا جنازہ پڑھایا گیا۔ جنازے میں ایرانی صدر مسعود پزشکیان اور سپیکر باقر قالیباف سمیت اعلیٰ حکومتی و عسکری عہدیداروں اور دنیا کے 100 سے زائد ممالک کے وفود سمیت لاکھوں شہریوں نے شرکت کی۔

گرینڈ مصلیٰ کے وسیع صحن میں جمع لاکھوں سوگواروں نے ہاتھوں میں سرخ جھنڈے اٹھا رکھے تھے، جنہیں ایران میں خون کا بدلہ اور انتقام کی علامت مانا جاتا ہے۔ جنازے کے دوران مجمع کی جانب سے ‘امریکا مردہ باد’ اور ‘انتقام، انتقام’ کے فلک شگاف نعرے لگائے گئے جن سے پوری فضا گونج اٹھی۔

آیت اللہ سید علی خامنہ ای اور ان کے اہل خانہ کی میتیں تہران میں عوامی دیدار (حاضری) کے لیے رکھ دی گئی ہیں۔ طے شدہ شیڈول کے مطابق پیر کی صبح تہران میں جنازے کا مرکزی جلوس نکالا جائے گا، جس کے بعد میتوں کو پہلے قم منتقل کیا جائے گا اور پھر وہاں سے جسدِ خاکی کو عراقی شہروں نجف اور کربلا لے جایا جائے گا۔ شہید سپریم لیڈر کی حتمی تدفین 9 جولائی کو ان کے آبائی شہر مشہد مقدس میں کی جائے گی۔ قم میں ان کے جنازے کی امامت ناصر مکارم شیرازی اور مشہد میں حسین نوری ہمدانی کریں گے۔ واضح رہے کہ آیت اللہ علی خامنہ ای 28 فروری کو ایران پر امریکی و اسرائیلی حملوں کے نتیجے میں شہید ہوئے تھے۔