ایران کا چین و دیگر دوست ممالک کو آبنائے ہرمز میں خصوصی سہولت دینے کا اعلان

ایران نے دنیا کی اہم ترین سمندری آبی گزرگاہ ‘آبنائے ہرمز’ میں چین اور اپنے دیگر دوست ممالک کو خصوصی تجارتی رعایت اور سہولیات فراہم کرنے کا بڑا اعلان کر دیا ہے۔

قطری نشریاتی ادارے ‘الجزیرہ’ کی رپورٹ کے مطابق، چین میں تعینات ایرانی سفیر عبدالرضا رحمانی فضلی نے بیجنگ میں منعقدہ ‘ورلڈ پیس فورم’ سے خطاب کرتے ہوئے کہا کہ ان کا ملک آبنائے ہرمز سے گزرنے والے چینی اور دیگر دوست ممالک کے تجارتی بحری جہازوں کو خصوصی رعایت دینے جا رہا ہے۔

ایرانی سفیر نے تفصیلات بتاتے ہوئے واضح کیا کہ پڑوسی ملک عمان کے ساتھ مکمل ہم آہنگی اور مشاورت کے تحت آبنائے ہرمز میں چین اور دیگر دوست ممالک کو سہولت فراہم کرنے کے لیے ایک نیا انتظامی ڈھانچہ اور طریقہ کار وضع کیا جائے گا۔ انہوں نے انکشاف کیا کہ اس نئے انتظام کے تحت آبنائے ہرمز کی حدود سے گزرنے والے بحری جہازوں پر ایک مخصوص ٹیکس بھی نافذ کیا جائے گا۔

عبدالرضا رحمانی فضلی نے ٹیکس کے حوالے سے پیدا ہونے والے ممکنہ خدشات کو مسترد کرتے ہوئے یقین دلایا کہ اس نئے ٹیکس کا اطلاق سمندروں کے بین الاقوامی قوانین (انٹرنیشنل میری ٹائم لا) کے بالکل منافی نہیں ہوگا بلکہ یہ مروجہ ضوابط کے عین مطابق ہوگا۔ ماہرین کے مطابق ایران کے اس اقدام سے خطے میں بیجنگ اور تہران کے اسٹریٹجک و اقتصادی تعلقات مزید گہرے ہونے کا امکان ہے۔