ویمنز ایشیا کپ کی فاتح بھارتی ٹیم کے کوچ کا محسن نقوی سے ٹرافی نہ لینے پر بیان

ویمنز ایشیا کپ کا فائنل جیتنے کے بعد بھارتی ویمنز کرکٹ ٹیم نے ایشین کرکٹ کونسل (اے سی سی) کے چیئرمین محسن نقوی سے ٹرافی وصول کرنے سے انکار کر کے کرکٹ کو ایک بار پھر سیاست کی نذر کر دیا ہے۔ دبئی میں انعامات کی تقسیم کے دوران بھارتی ٹیم نے گراؤنڈ میں آنے کے بجائے ڈریسنگ روم کے باہر رہنے کو ترجیح دی، جس کے باعث تقریب بھارتی ٹیم کی غیر موجودگی میں ہی مکمل ہوئی اور اے سی سی نے ٹرافی اپنے پاس رکھ لی۔ بھارتی ویمنز ٹیم نے فائنل میں دفاعی چیمپئن سری لنکا کو شکست دے کر 8ویں بار ایشیا کپ کا ٹائٹل جیتا تھا۔

واقعے کے بعد میڈیا سے گفتگو کرتے ہوئے بھارتی ویمنز ٹیم کے ہیڈ کوچ امول مزومدار نے واقعے کا دفاع کرتے ہوئے کہا کہ ٹرافی نہ لینے کا فیصلہ بھارتی کرکٹ بورڈ (بی سی سی آئی) کا تھا اور پوری ٹیم اس فیصلے کے ساتھ کھڑی ہے۔ ان کا کہنا تھا کہ یہ قدم اسپورٹس مین اسپرٹ کے خلاف نہیں ہے اور ان کے لیے یہ ٹورنامنٹ ختم ہو چکا ہے۔ ٹرافی ملنے سے متعلق سوال کے جواب میں انہوں نے لاعلمی کا اظہار کرتے ہوئے کہا کہ بھارت ’ایشیا کپ 2026 کا چیمپئن‘ قرار پایا ہے اور اب ان کی نظریں ایشین گیمز پر ہیں۔ دوسری جانب اے سی سی ذرائع کے مطابق ٹرافی دینے کا پروٹوکول پہلے سے طے تھا اور کونسل کرکٹ کو کھیل کے طور پر ہی آگے بڑھانے کی پالیسی پر عمل پیرا ہے۔